今晚亞冠精英盃B組第4輪焦點戰，柏克塔哥主場硬撼艾納斯。正所謂殺雞焉用牛刀，據報艾納斯今仗會讓王牌C朗抖抖，冇咗呢位射手攻力點都差啲，柏克塔哥遇強勢必死守，唔慌多波入，捧3.5球入球細。（周一晚9時45分開賽）文:法達斯維

沙特職勁旅艾納斯各項賽事5連勝，包括日前聯賽以5比3擊敗艾科魯特，C朗更加大演帽子戲法。不過艾納斯仍然落後榜首希拉爾2分，主帥普斯迪高路考慮到柏克塔哥實力較弱，據報會畀3名外援C朗、京士利高文同施馬根休息，唔會隨隊去烏茲別克，養精蓄銳準備下輪聯賽對艾哈森。

查實艾納斯因沙特當地安全問題，上輪對艾華斯爾已經延期，而佢哋頭2輪取得1勝1負，首輪慘吞艾阿恩4蛋肉酸到暈，次輪贏尼夫治3比1成功止跌，C朗亦有士哥，因此今仗冇咗呢位射手兼隊長，攻力難免打折扣。

另邊廂，柏克塔哥頭3輪只得2和1負未贏過，不過要留意，佢哋先後賽和吉達艾阿里同艾卡迪沙，似乎對住沙特職球隊特別有計，連同上輪輸畀空軍體育會，3仗全開2球或以下，可見呢支烏茲別克球隊守強於攻，今遇艾納斯都會照辦煮碗玩死守，入球細更可取。

艾薩德難抗吉達艾阿里
另一支沙特職勁旅兼衞冕之師吉達艾阿里，今輪會作客卡塔爾球隊艾薩德。吉達艾阿里雖然日前聯賽對艾沙比慘敗1比6，但全因早早打少個，查實佢哋近6場贏咗5次，包括2場亞冠精英盃連挫艾華斯爾同艾加拉法，頭3輪累積2勝1和，相反艾薩德頭3輪只得1和2負，今仗凶多吉少。（HOY 76周二凌晨零時直播）