英超重頭戲，利物浦主場迎戰阿仙奴，「紅軍」利物浦上周中英聯盃惡鬥車路士，並且少「兵工廠」1日時間休息，體力比較輸蝕，或會放慢比賽節奏先求穩，以免後勁不繼。阿仙奴作客水準往往打折扣，包括上場英聯盃被乙組球隊費列活特淘汰，今仗應會穩陣行先，避免重蹈覆轍。參考阿仙奴近4場聯賽作客有3次開2球或以下，首選2.5球入球細。（Now 621及611周一凌晨零時30分直播）文:Mic少

利物浦近期頻頻奏捷，但要留意佢哋踢到上輪英超贏白禮頓2比0，先至打開今季聯賽主場勝利之門，其中1個入波更加係對手擺烏龍，發揮唔出太大地利優勢。「紅軍」上場英聯盃16強同車路士法定時間打和1比1，憑互射12碼勝出，過程非常激烈，主帥伊拉奧拿焗住下半場換入巴特利巴高拿、域斯等主力上陣搏殺，未能取得留力效果。

另外，利物浦近期有唔少球員輪流受傷，包括兩位進攻猛將蘇保斯拉爾、域陀蒙路斯仍然有傷在身，就算復出，都未必可以恢復最佳狀態，難免影響攻力。

兵工廠作客鋒力弱
至於阿仙奴上場英聯盃即使狂攻費列活特，但只能逼和1比1，最終更互射12碼落敗出局，各項賽事近4場作客只有1勝，作客腳軟成為呢支英超衞冕之師一大死穴。就算單計近4場英超作客有3勝1負，但當中兩場小勝1比0，另一場贏2比0，以及吞白禮頓3蛋，鋒力疲弱欠缺說服力。加上兩位翼鋒布卡約沙卡、謝索利斯養傷，要攻入「紅軍」大門，並非易事。雙方屬於五五波，預料入球數字唔會多。